جرحى المليشيا:… تجاهل عبد الرحيم دقلو يثير السخط والتساؤل رسائل صوتية تكشف حالة من اليأس وخيبة الأمل وسط جرحى المليشيا جريح مليشي: “الليلة بعد ما اتعوقنا بقينا مرميين في الأرض لا علاج ولا سؤال!” مصاب لدقلو: “صبر الجرحى بدأ ينفد: بقينا نتصل عليك وتقفل الخط في وشنا!” غياب الرد على رسائل الجرحى يفتح باب التساؤل حول مصير دقلو الجريح عمر: “يا حضرة الفريق، الحالة بقت صعبة والغليان زاد وسط الجرحى.”
جرحى المليشيا:... تجاهل عبد الرحيم دقلو يثير السخط والتساؤل رسائل صوتية تكشف حالة من اليأس وخيبة الأمل وسط جرحى المليشيا جريح مليشي: "الليلة بعد ما اتعوقنا بقينا مرميين في الأرض لا علاج ولا سؤال!" مصاب لدقلو: "صبر الجرحى بدأ ينفد: بقينا نتصل عليك وتقفل الخط في وشنا!" غياب الرد على رسائل الجرحى يفتح باب التساؤل حول مصير دقلو الجريح عمر: "يا حضرة الفريق، الحالة بقت صعبة والغليان زاد وسط الجرحى."

جرحى المليشيا:… تجاهل عبد الرحيم دقلو يثير السخط والتساؤل
رسائل صوتية تكشف حالة من اليأس وخيبة الأمل وسط جرحى المليشيا
جريح مليشي: “الليلة بعد ما اتعوقنا بقينا مرميين في الأرض لا علاج ولا سؤال!”
مصاب لدقلو: “صبر الجرحى بدأ ينفد: بقينا نتصل عليك وتقفل الخط في وشنا!”
غياب الرد على رسائل الجرحى يفتح باب التساؤل حول مصير دقلو
الجريح عمر: “يا حضرة الفريق، الحالة بقت صعبة والغليان زاد وسط الجرحى.”
جريح لدقلو: “امسح رقمي ذاتو من عندك، ونتلاقى في الشارع!”
مصاب لعبد الرحيم: “يا زول، نحنا ما جينا نتوسل ليك ولا بنشحت منك.”
هل أقعد المرض عبد الرحيم أم فاض به الحال وسط تقدم القوات المسلحة؟
تقرير: رمضان محجوب
أثار تجاهل قائد ثاني مليشيا الدعم السريع، عبد الرحيم دقلو، لرسائل صوتية واتصالات بعث بها جرحى المليشيا في كردفان ودارفور موجة واسعة من السخط والغضب في صفوف المصابين وذويهم، وسط شكاوى متصاعدة من انعدام الاستجابة الرسمية لما وصفوه بتدهور أوضاعهم الصحية والمعيشية.وبالتوازي مع هذا التجاهل، كشف الجرحى في رسائلهم الموجهة عبر تطبيق واتساب والتي استمعت إليها “العودة” عن نقص حاد في الخدمات الطبية وضعف إدارة المرافق العلاجية، إلى جانب صعوبة الحصول على الأطراف الصناعية أو التدخلات الجراحية المتقدمة التي يتعذر توفرها محلياً، فضلاً عن تعثر السفر للعلاج في الخارج.
▪️ صمت القائد
في رسالته لقائد ثاني المليشيا، أثار الجريح أبو بكر موسى قضية التجاهل التام لرسائلهم الصوتية، قائلاً بمرارة: “يا حضرة الفريق، بنرسل ليك رسايلنا الصوتية في الواتساب وبتصلك، لكنك ما بترد ولا على رسالة واحدة”. وأضاف موضحاً حجم معاناتهم في كردفان ودارفور بعد الإصابات القاسية التي لحقت بهم في المعارك: “نحنا راقدين في الواطة دي بوجعنا، وكنا راجين منك تسمع صوتنا وتشوف حالنا، لكن تطنيشك لينا خلى الجرحى يحسوا إنهم اتنسوا خلاص بعد ما اتكسروا في الميدان، وبقوا ما لاقين الزول البسأل عنهم أو يعبرهم بكلمة”.
▪️ إهمال المستشفيات
بينما أوضح الجريح حامد إدريس في رسالته لعبد الرحيم دقلو واقع التردي الكبير داخل المرافق الصحية، قائلاً: “يا سعادتك، إدارة المستشفيات دي تعبانة شديد وما بتداوي في الناس، الواحد يمشي ليهم بورقه يوزعوه ساكت بدون علاج ولا متابعة”. وأشار بلهجة غاضبة إلى ما يجري في بعض المراكز العلاجية بقوله: “الناس الخاتنهم في اللجان دي ما شغالين بينا، ولا في جرعة علاج متوفرة، الواحد فينا مكسر في القضية دي من بداية الأحداث، ومعقول لحدي هسه زول ما يلقى علاج عديل يوقف بيه على حيله ويخفف بيه ألمه؟”.
▪️ فقدان الأطراف
وكشف الجريح الطيب آدم في تسجيل صوتي مؤثر عن مأساته بعد بتر يديه في المواجهات، مخاطباً دقلو بقوله: “سيد عبد الرحيم، شوف صوري الرسلتهن ليك، أنا يديّ الاتنين مقطوعات بضربة آر بي جي، وما فضل لي إلا أصبع واحد بس باكل بيه”. وتابع مطالباً بتدبير علاجه خارج البلاد: “حالتي بالبلاء يا سعادتك، الأكل ذاته ما قادر آكله برايي، وداير منك تصدق لي أمشي أركب أطراف صناعية تتحرك برة السودان عشان أقدر أمارس حياتي وأخدم نفسي بدل القعدة الصعبة دي من العام الفات”.
▪️ غياب الرواتب
وانتقد الجريح يوسف عمر انقطاع المرتبات والمستحقات المالية عن المصابين، مؤكداً في رسالته الصوتية: “يا حضرة الفريق، الزول الجريح ده لا عنده مرتب ولا عنده مصاريف، والواحد فينا ما لاقي حق الدواء ولا قوط بطنه”. وأضاف بنبرة يملؤها الأسى على حالهم المعيشي: “نحنا ما ناس بنسرق ولا بنشبشب، نحنا ناس لينا قيم ومبادئ، واتكسرنا في الميدان عشان القضية دي، فكيف يخلونا قاعدين سنة وشوية بدون قرش واحد يمشي حالنا وحال عيالنا البيعاينوا لينا في الظروف القاسية دي؟”.
▪️ وعود كاذبة
وسرد الجريح إدريس صالح تفاصيل رحلته المرهقة بين اللجان والمسؤولين دون جدوى، قائلاً لعبد الرحيم دقلو: “يا سعادتك، السنة الفاتت قابلنا القائد وحولنا لأمين البشر عشان يحل موضوعنا، ومن يومها لليوم ما شفنا أي حاجة”. وأردف موضحاً حالة المماطلة التي يواجهونها: “كل ما نمشي لجهة يقولوا لينا ارجعوا لعبد الرحيم، وعبد الرحيم ما بيرد علينا، بقينا زي الكورة بين اللجان والضباط، يكتبوا لينا ورق ويوزعونا ساكت بدون أي حل حقيقي ينهي عذابنا المستمر ده”.
▪️ كرامة الجندي
وشدد الجريح موسى إبراهيم في رسالته على أنهم يطالبون بحقهم المشروع لا بالشفقة، قائلاً بلهجة حاسمة: “يا زول، نحنا ما جينا نتوسل ليك توسيلا ولا بنشحت منك شحدة، نحنا عساكر انضربنا في الميدان ودمنا ده دفعناه غالي”. واستطرد رافضاً أسلوب التجاهل واللامبالاة: “شغلة المذلة دي نحنا ما بنحبها، والواحد فينا كان عزيز لما كان شايل سلاحه، فما ممكن لما يقع ويتعوق يلقى التطنيشة دي، إذا ما دايرين تشتغلوا بينا قولوا لينا عديل عشان كل زول يمشي يدبر راسه بطريقته”.
▪️ أسر الشهداء
ولفت الجريح جمعة إسحاق الانتباه إلى الأوضاع القاسية التي تعيشها أسر القتلى والمصابين، مخاطباً قائد ثاني المليشيا بقوله: “سيد عبد الرحيم، أنا عندي أخوي شقيقي استشهد في أول المعارك وخلى ستة أطفال ما لاقين حق الأكل ولا أي عون”. وأوضح حجم المعاناة الأسرية التي تضاعف أوجاعهم: “عيال أخوي الشهيد عايشين على الحاجة البسيطة العندي، وأنا ذاتي معوق ومقطوع اليدين، لا طلعوا ليه شهادة ولا صرفوا ليهم حقوقهم، معقول زول يموت في الميدان وأولاده يضيعوا كده بدون زول يسأل عنهم؟”.
▪️ خذلان المقاتلين
وعبّر الجريح بشير علي عن شعوره العميق بالخذلان بعد تضحياته في الخطوط الأمامية، قائلاً في رسالته: “يا حضرة الفريق، نحنا كنا راقدين في الثلاث عشرينات وبنواجه الطيران في المقدمات، واتكسرنا من أوائل الناس في الحرب دي”. وأكمل حديثه بنبرة عتاب قاسية: “الليلة بعد ما اتعوقنا بقينا مرميين في الأرض لا علاج ولا سؤال، وإخواننا لسه بيحاربوا في الميدان، لكن لما يشوفوا حالنا ده ويشوفوا إنكم ما بتعبرونا حتى برسالة، أكيد حيتأكدوا إنو ما في زول بيحفظ حق الزول البقع”.
▪️ انسداد الأفق
وأشار الجريح حبيب الله إلى تعقيدات السفر وصعوبة الحصول على علاج متقدم في الداخل، موضحاً في تسجيله: “يا سعادتك، نحنا محتاجين لعمليات زراعة عظام وأطراف، والحاجات دي هنا في السودان ما متوفرة، والسفر برة مقفول علينا”. وتابع مطالباً بتسهيل إجراءاتهم العاجلة: “أنا هسه بتواصل مع دكتور في الهند عشان الأطراف، بس داير منكم تصدقوا لي بقروش العلاج والسفر، لأنو القعدة هنا بدون تدخل طبي بتزيد المضاعفات كل يوم وبتقفل قدامنا كل أبواب الأمل في الشفاء”.
▪️ سخط واسع
ونقل الجريح مبارك حسن صورة الغضب المتصاعد في أوساط المصابين وذويهم، قائلاً لعبد الرحيم دقلو: “يا جنابو، السخط بقى واسع شديد بين الجرحى في كردفان ودارفور، والناس وصلت مرحلة ما بتتطاق من الإهمال والتجاهل”. وأكد أن صبر الجرحى بدأ ينفد: “بقينا نتصل عليك وتقفل الخط في وشنا، ونرسل ليك وتسمع الرسايل وتطنش، الكلام ده خلى النفوس تشيل وتغلي، لأنو ما معقول زول يضحي بعافيته وفي النهاية يلقى الجفاء ده من قيادته”.
▪️ جرحى المعارك
وروى الجريح عادل محمد تفاصيل إصابته القديمة ومعاناته المستمرة دون تدخل جراحي حاسم، قائلاً: “حضرة الفريق، أنا مضروب في أم درمان ومحتاج بس أشيل المسطرة والحديد من رجلي عشان أقدر أمشي زي الناس”. وأضاف موضحاً عجزه عن تحمل تكاليف العلاج الخاص: “مستشفياتكم دي ما بتعالج زول، وأنا طلبي الوحيد منك تديني قروش أمشي أتعالج بيها في مستشفى خاص على حسابي، لأنو حرام زول يفضل شايل الحديد في رجله سنة ونص بدون ما يلقى زول يخلصه من الوجع”.
▪️ نداء عاجل
ووجّه الجريح عبد الله نور نداءً مباشراً لإنهاء حالة الانتظار والغموض التي يعيشونها، قائلاً: “يا سعادتك، رد علينا وفهمنا الحاصل شنو، كان في حل لينا قولوا لينا أهلاً وسهلاً، وكان ما في حل برضو كلمونا”. وأضاف مؤكداً حاجتهم لإجابة واضحة: “نحنا تعبنا من الانتظار والوعود الما بتتم، وما دايرين نفضل معلقين ساكت، أرسل لينا كلمة واحدة توضح مصيرنا أو وجهنا لزول عنده صلاحية يحل مشكلتنا دي الليلة قبل بكرة”.
▪️ خيبة أمل
وأبدى الجريح صلاح الدين خيبة أمله الكبيرة من صمت القيادة تجاه نداءاتهم المتكررة، قائلاً: “السلام عليكم يا سعادة عبد الرحيم، والله ما كنا متوقعين منكم المعاملة دي، كنا قايلين رسايلنا حتلقى عندكم اهتمام سريع”. وتابع بلهجة يائسة: “بعد ما أرسلنا ليك المرة الأولى والتانية وما عبرتنا، حسينا إنو صوتنا ما ليه قيمة عندكم، وإنو تضحياتنا راحت شمار في مرقة، وده إحساس صعب شديد على زول كان شايل روحه في كفه”.
▪️ غليان الصفوف
وحذر الجريح عمر التجاني من تداعيات استمرار هذا التجاهل على معنويات المقاتلين، قائلاً في رسالته الصوتية: “يا حضرة الفريق، الحالة بقت صعبة والغليان زاد وسط الجرحى، وكل زول فينا بقى شايل همو ووجعو في قلبه”. وأردف موضحاً حجم الاحتقان: “الواحد فينا يمشي الطبية يقعد بالأيام وما يلقى نتيجة، ولما يلجأ ليك باعتبارك المسؤول الأول ما يلقى رد، وده بيخلي الكلام يكتر والزعل يزيد بين الصفوف، لأنو الظلم والتهميش ما بيقدر يتحملهم زول”.
▪️ امسح رقمي
واختتم الجريح نصر الدين رسائل المصابين بمطالبة واضحة وحاسمة، قائلاً لعبد الرحيم دقلو: “يا أخوي، اسمع رسالتي دي كويس، دي آخر مرة براسلك فيها، إذا رديت لينا وحليت مشكلتنا كتر خيرك، وإذا ما رديت أهلاً وسهلاً”. وأنهى حديثه بنبرة تحدٍّ وعتاب: “امسح رقمي ذاتو من عندك، وإن شاء الله نتلاقى في الشارع، لأنو الزول البشوف نفسه على الناس وبيطنش جرحاه ما بيستاهل نرجع نطلب منه حاجة تاني، وربنا وحده هو البيجيب لينا حقنا”.
▪️ تساؤلات المصير
تعكس هذه الإفادات المتلاحقة أزمة عميقة داخل المليشيا، حيث يثير عدم رد عبد الرحيم دقلو على أكثر من مئة رسالة للجرحى تساؤلات واسعة حول دوافعه الحقيقية؛ فهل تمكن منه داء السكري ومضاعفاته الصحية فجعله عاجزاً عن التفاعل حتى مع رسائل جنوده، أم أن الأمر قد فاض به ولم يعد قادراً أو راغباً في الرد على أحد في ظل التقدم المتواصل للقوات المسلحة والقوات المساندة لها في مختلف محاور القتال، ليبقى مصيره ومصير جرحاه معلقين وسط حالة متصاعدة من الارتباك والخذلان والغضب المكتوم داخل الصفوف المنهكة؟




