عفاف الأمين تكتب.. وهج المشاعر ..سودان جديد
التحية اولا وثانيا وعاشرا لقوات شعبنا المسلحة الرحمة والمغفرة للشهداء والشفاء العاجل للمصابين والجرحى سنتين من الالم والحزن والخراب والدمار للبنية التحتية للوطن. السودان باكمله اصبح عبارة عن صيوان بكا كبير من منا لم يفقد عزيز لديه ام اب خال عم اخ صديق جار او زميل كلنا فى الحزن شرق والابتلاءات من رب العالمين ونحن قوم نؤمن بالقضاء والقدر والمسطر والمكتوب والقسمة والنصيب .ولكن هناك عبر ودروس مستفادة واكيد الشعب السودانى كله يكون استفاد من امتحان الحرب الرهيييب ده وبما انو البشريات قادمة والعودة قريبة خلونا كل واحد يجرد حسابه مع الحرب دى وشنو العايزنو فى سودانا الجديد عشان ما نغلط نفس الغلط تانى تعالو نحسب الغلط الوقعنا فيهو زمان اولا حسن النية فى التعامل مع الناس اى زول نفتح ليهو قلبنا ونصدقو نحكى لى البينا والعلينا وده غلط تانيا اصحاب الاملاك والبيوت والشقق اى زول جيبو تقيل بيأجرو لى بدون ما يتحرو عنو ويسألو عليهو اصله وفصله وبلدو وين تانيا ستات الشاى الملن شوارع الخرطوم وخاصة شارع النيل ولمن العطالة والمرتزقة والعملاء والخونة وتالتا حدودنا المفتوحة لكل من هب ودب شى تهريب وشى عديييل بالدرب طالما فى مرتشين وفاسدين رابعا القونييين والقونات الملو البلد هبوط وانحطاط فنى ما انزل الله به من سلطان خامسا احياء قاع المدينة او ما يسمى بالسكن العشوائى او الاحياء الطرفية هى الخطر الحقيقى المحيط بالعاصمة كفاكم الخمسة ديل فى سودانا الجديد مادايرين حسن نية فى التعامل مع الغريب ومافى ايجار لى اى زول الا بعد التأكد من هويته ومافى راكوبتى وراكوبتك وعريشتى وعريشتك ونسكن فى اى مساحة فاضية ومافى ستات شاى كل راجل يشرب الشاى فى بيتو ومافى قونات وغنا هابط ومساخر وقلة ادب محتاجين نرجع سودانا الجديد بشكل مختلف وبروئة مختلفة وفهم مختلف …ياخ الخرطوم ابنو حوليها سور ضخم زى سور الصين العظيم واعملو ليها بوابات والدخول بالبصمة
